چەند شیرکەتێکی پەیوەندیدار بە ئیدارەی ئاو و ئاوەڕۆ لە پارێزگای سنە، بەناوی پیادەکردنی پرۆژەکانیانەوە دەستیان بەسەر زەوی و زاری خەڵکی چەندین گونددا گرتووە.
بەپێی زانیارییەکان، زەوی و زاری ٣٠٠ وەرزێڕی خەڵکی گوندەکانی "قوڵیان، باوەرێز، نایسەر، قڵیچیان، سەرئاو و قامیش" لە دەوروبەری چۆمی قشڵاق لەلایەن ئیدارەی ئاو و ئاوەڕۆوە دەستی بەسەردا گیراوە و لە ئیدارەی بەڕێوەبەرایەتیی بەڵگەی ئەو شارەدا تاپۆ کراون.
خەڵکی ئەو گوندانە سکاڵایان لە دژی ئەو دوو شیرکەتە تۆمار کردووە و پارێزەریان بە مەبەستی بەدواداچوونی کارە یاساییەکانی ئەو سکاڵایە گرتووە، بەڵام پارێزەرەکە پێیانی ڕاگەیاندووە کە لە ڕێگەی یاساییەوە ناتوانن بەرهەڵستی ئەو ئیدارەیە ببنەوە و دەبێ بە هەوڵ و ماندووبوونی خۆیان زەوی و زارەکانیان لە چنگیان دەربێنن.
