کوردستان میدیا: کاربەدەستانی تاران لە ڕێگای قوتابییانەوە دەیانهەوێت شەڕی ئامریکا بکەن و قوتابییان بکەنە قوربانیی سیاسەتەکانی خۆیان.
"محەممەد بەتحایی"، وەزیری پەروەردە و بارهێنانی ڕێژیمی ئێران لە کۆبوونەوەیەکدا باسی لەوە کردووە: "١٤ میلیۆن قوتابیمان هەیە کە ئەگەر پێویست بێت وەک سەردەمی شەڕی ٨ ساڵە حەماسە دەخولقێنن."
ئەو کاربەدەستەی ڕێژیمی ئێران باسی لە ڕۆڵی قوتابییان لە سەردەمی شەڕی ٨ ساڵەدا کردووە کە خزمەتێکی زۆریان بە نیزام کرد.
ئەو وەزیرەی ڕێژیمی ئێران لە قسەکانیدا باسی لە ڕۆڵی پێگەی مامۆستایان و قوتابییان کردووە کە سەرمایەی وڵاتن.
بەتحایی باس لە ڕۆڵ و پێگەی مامۆستایان و قوتابییان دەکات، بەڵام دۆخی مامۆستایان و قوتابییان لە ئێراندا زۆر نالەبارە.
لە شەڕی ٨ ساڵەی نێوان ئێران و عێراقدا، ٣٢ هەزار و ٢٧٥ قوتابی بوونە قوربانیی سیاسەتەکانی ڕێژیمی ئێران. هاوکات ٢ هەزار و ٦٠٨ خوێندکاریش لەو شەڕەدا کوژران.
سیستمی پەروەردە و بارهێنانی ڕێژیمی ئێران وەک یەکێک لە کۆنترین و داوکەوتوترین سیستمەکانی پەروەردەی جیهان ئەژمار دەکرێت.
ئێستاش گۆڕینی سیستمی پەروەردەیی له ئێران له لایەن ڕێژیمەوە، بۆ نوێکردنەوە و گەیاندنی ئاستی زانیاری له قوتابخانەکان لە ئاستی جیهانیدا نییە، بەڵکوو ڕێژیمی ئێران بە پەرەپێدانی بیری شیعەگەرایی دەیهەوێت کاریگەریی سیاسەتە دواکەوتووەکانی خۆی زۆرتر بکات و بیرۆکەی مەزهەبی له جۆری ولایەت فەقیهـ له نێو جیلی نوێی نەتەوەکانی ئێران زۆرتر پەرە پێ بدات.
