بەپێی هەواڵی گەیشتوو بە ماڵپەڕی "کوردستان میدیا" لە پارێزگای ورمێ و بە تایبەت شارەکانی باشووری ئەو پارێزگایە، کەشێکی ئەمنییەتی بەسەر ئیدارەکانی پەروەردە و بارهێناندا زاڵە و مامۆستایان ناتوانن بۆ ویست و داخوازییەکانیان ناڕەزایەتی بەڕێوە ببەن.
لە ئێستادا لە زۆربەی شارەکانی پارێزگا بەڕێوەبەرانی ئیدارەی پەروەردە و بارهێنان بە شێوەی کاتی دامەزراون و هەر کات بە پێویست بزانن جێگۆڕکێ بە بەڕێوەبەران دەکەن و کەسانی سەر بە ڕێژیم دادەمەزرێنن.
بۆ نموونە چەند مانگ لەمەوپێش بەڕێوەبەری ئیدارەی پەروەردە و بارهێنانی پیرانشار بە ناوی "سەلام پیشیاریان" بە هۆکاری نادیار دەسبەسەر کرا و بە جێگای ناوبراو تورکێکی نەغەدەیان دامەزراندووە.
ئەوە لە حاڵێکدایە کە هەتا ئێستا ئەگەر کوردێکیش وەک بەڕێوەبەری ئیدارەی پەروەردە و بارهێنان دامەزرابێت، سەر بە ڕێژیم بووە.
هەروەها لە بەشی حراسەتی پەروەردە و بارهێنانی پیرانشار تورکێکی نەغەدە لەسەر کارە کە بۆ بەشێکی زۆر لە مامۆستایان دۆسیەی دروست کردووە.
دامەزراندنی مامۆستایانی سەر بە ڕێژیم لە ئیدارەکانی پەروەردە و بارهێنان لە کوردستان سیستماتیکە و تەنیا ئامانجیان پێشگرتن بە چالاکیی مامۆستایانی دڵسۆزی کوردە.
