کوردستان میدیا: سەرەڕای گرانیی دەرمان و نەبوونی پێداویستییەکانی نەخۆشیی تالاسمی، دوکتورەکانیش ڕەفتاری نەشیاویان بەرانبەر ئەنجام دەدەن.
بەپێی ڤیدئۆییەکی بڵاو کراوە، لە لاپەڕەی "مەسیح عەلی‌نەژاد"، دوکتورێک لە نەخۆشخانەی بەهرامیی تاران، بە شێوەیەکی نەشیاو و دوور لە ئێخلاقی دوکتورانە بەرانبەر بە نەخۆشێک ڕەفتار دەکات و بەسەریدا هاوار دەکات.
ئەم نەخۆشە بە هۆی ناڕەزایەتیدەربڕین لە هەمبەر خراپی کەیفیەتی ئەو خوێنەی کە پێیان دەدەن، دەکەوێتە بەر هێرشی دوکتورێک و کاتێک کە بوتڵە خوێنەکەی بەدەستییەوە پەلاماری دەدات و دەیەوێت لێی بدات.
ئەو کەسەی کە فیلمەکەی گرتووە دەڵێت: "ناڕەزایەتیمان بەرانبەر بەو کیسە خوێنانە دەربڕی، کە کاتێک پێمانی دەدەن، تەنیا ١٠ ڕۆژی ماوە بۆ بەسەرچوونی، بەڵام بەم شێوە دڕندانە و بێڕەحمانە وڵاممان دەدەنەوە".
نەخۆشەکانی تالاسیمی دوای دەسپێکردنی گەمارۆوەکانی ئامریکا، بە هۆی نەبوونی دەرمانە پێویستەکانیان و گرانبوونیان تووشی کێشە هاتوون و سەرەڕای ئەم کێشانەش زۆرجار لەگەڵ ڕەفتاری نەشیاوی دوکتور و کارمەندانی نەخۆشخانە ڕووبەڕوو دەبنەوە.
