دایە "نەخشین فەقێ حەسەن" ژنێکی نیشتمانپەروەر و حیزبدۆست لە گوندی "ئیسلاملوو" سەر بە ناوچەی "دەشتەبێڵـ"ـی شنۆ ماڵاوایی لە ژیان کرد.
ناوبراو ڕێکەوتی ٣ی گەلاوێژی ١٣١٧ی هەتاوی لەدایک بووە.
دایە نەخشین لەنێو خەڵكدا زۆر جێگای ڕێز و حورمەت بووە. بە ھەموو شێوەیەک کە لە دەستی ھاتووە یارمەتیدەری پێشمەرگە بووە، بە نان پێدان و جل شوشتن و ھەتا شاردنەوەی پێشمەرگە.
برایەکی ناوبراویش بە ناوی "محەممەد فەقێ حەسەن" ناوسراو بە "محەممەدە شەل" پێشمەرگەی هێزی پێشمەرگەی کوردستان بووە و تێکەڵ بە کاروانی شەهیدان بووە.
یەکێک لە وەسییەتەکانی دایە "نەخشین" ئەوە بوو کە بە سروودی نەتەوەیی "ئەی ڕەقیب" و ئاڵای کوردستان بە خاک بسپێردرێت.
حیزبی دێموکراتی کوردستانی ئێران سەرەخۆشی لە بنەماڵە و کەسوکاری دایە نەخشین دەکات و خۆی بە شەریکی خەمیان دەزانێت.
