لە ماوەی چەند ڕۆژی ڕابردوودا چەند کەس لە ئیدارەی ئیتلاعاتی پیرانشار ڕژاونەتە نێو کافەکتێبی ئەندێشەی ئەو شارە و بە لێدان و سووکایەتی، بێڕێزییان بە بەڕێوەبەرانی ئەو کافەیە کردووە.
هێزە تاڵانچییەکانی ڕێژیم دەستیان بەسەر کامپیۆتێر و چەندین کتێبدا گرتووە و لە بەرامبەردا یەکێک لە بەڕێوەبەرانی کافەکە بەرەنگاریان بووەتەوە. پاشان ئەو بەڕێوەبەرەی کافەیە دەسبەسەر دەکەن و بۆ ئیدارەی ئیتلاعاتی دەبەن و پاش لێدان و ئازار و ئەشکەنجەیەکی زۆر و هەڕەشەکردن، ئازادی دەکەن.
سەرچاوەکان باس لەوە دەکەن کە ڕۆژانە چەند کەسایەتیی بەناوبانگ بۆ کتێبخوێندنەوە سەردانی ئەو کافەیە دەکەن و بووەتە هۆی ئەوەیکە لاوەکان هان بدرێن کتێب بخوێننەوە.
ئەو هەوڵەی ڕێژیم لە حاڵێکدایە کە لە شارەکانی کوردستان و ئێران بە هەزاران شوێن بۆ نێرگەلەکێشان هەیە کە سەرەڕای داخوازیی هاووڵاتییان بۆ داخستنیان، ئەو شوێنانە داناخرێن.
