نەیارانی ژینگە بەردەوامن لە لەنێوبردنی دارستان و لێڕەوارەکان لە مەریواندا و لە هەموو دۆخێکدا هێرش دەکەنە سەر ژینگەی ئەو ناوچانە و ئەمجارەش بەشێکی تر لە دارستانەکانی مەریوانیان بڕیوە.
جارێکی دیکە نەیارانی ژینگە، هێرشیان کردووەتە سەر سروشتی مەریوان و دەستیان کردووە بە بڕینی دار و لێڕەوارەکانی گوندی "وەیسە".
دارەکانی دارستانەکانی ئەو گوندە لە جۆری "بەڕوو"ن و لەنێوبردنی ئەو دارانە دەبێتە هۆی خەسارێکی قەرەبوونەکراو کە خاک و سروشتی ئەو ناوچانە لە بواری شۆرانەوەی خاک و نەمانی لێڕەوار و زۆر بواری دیکەوە دەخاتە مەترسییەوە.
ماوەی چەند ساڵە کەسانی بەرژەوەندیخواز بە مەبەستی کەڵکی تاکەکەسی و زۆربەی کاتیش بە پشتیوانیی ڕێژیم، دەستیان کردووە بە لەنێوبردنی ژینگەی کوردستان و ئەم کارەش بە شێوازی جیاواز دەبەنە پێشەوە، هەر لە بڕینەوەی دارەکان و لەنێوبردنی لەوەڕگەکانەوە بگرە تا سووتاندن و قڕکردنی ژینگە.
