ڕێکەوتی ١ی سەرماوەزی ١٣٩٩ی هەتاوی، کەسایەتییەکی خۆشناو و نیشتمانپەروەر و ئەندامی دێرینی حیزبی دێموکراتی کوردستانی ئێران بە ناوی کاک "نەچەلیک هەنارە"، خەڵکی گوندی "مەلوونە"ی ناوچەی برادۆستی ورمێ ماڵاوایی لە ژیان کرد.
کاک "نەچەلیک" لە ساڵەکانی ٤٧ــ٤٦ی هەتاوی چالاکی و تێکۆشانی هەبووە. ناوبراو دوای هاتنە سەر کاری ڕێژیمی ئیسلامیی ئێران بەردەوام بووە لە خزمەتکردن بە حیزبی دێموکرات و وەکوو ئەندام ئەرکە پێسپێردراوەکانی جێبەجێ کردووە.
ئەو کەسایەتییە حیزبدۆستە زۆر جار لەلایەن ڕێژیمەوە لەژێر گوشار و ئازار و ئەشکەنجەدا بووە، بەڵام هیچ کات تەسلیمی ویست و داخوازییەکانی دوژمن نەبووە و لێبڕواونەتر لە جاران، لەسەر ئامانج و ڕێبازی حیزبەکەی پێداگر بووە.
کاک "نەچەلیک" لە ماوەی ژیانی سەربەرزانەیدا چەندین جار سەردانی حیزبی دێموکراتی کوردستانی ئێرانی کردووە. هەروەها لەگەڵ کاک "مستەفا هیجری" لێپرسراوی گشتیی حیزبی دێموکرات چاوپێکەوتنی هەبووە و کەسێکی جێگای باوەڕ و متمانەی حیزبی دێموکرات بووە.
تەرمی ناوبراو لە زێدی خۆی بە خاکی پیرۆزی کوردستان ئەسپێردرا.
حیزبی دێموکراتی کوردستانی ئێران، سەرەخۆشی لە بنەماڵە و کەسوکاری کاک "نەچەلیک" دەکات و خۆی بە هاوبەشی خەمیان دەزانێت.
