کوردستان میدیا: کرێکارانی ڕێگای ئاسنی پارێزگای تەورێز، لە ناڕەزایەتی لە هەمبەر نەدرانی مووچە مانیان گرت.
هەواڵە بڵاوکراوەکان باس لە درێژەکێشانی مانگرتنی کرێکارانی ڕێگای ئاسنی پارێزگای تەورێز، لە ڕۆژانی ٢٥ و ٢٦ی ڕێبەنداندا دەکەن.
ئەم مانگرتنە لە درێژەی مانگرتنەکانی کرێکاران لە شارەکانی مەرەند و جوڵفا، تەورێز و عەجەبشێر هاتنە ئاراوە.
مانگرتن لە شارەکانی تەورێز و عەجەبشێر، لە ٢٣ی ڕێبەندانەوە دەستی پێ كردبوو.
کاناڵی تێلێگرامیی کرێکارانی ڕێگای ئاسن، هەروەها باسی لە نەدرانی مووچەی چەند مانگی کرێکارانی ڕێگای ئاسنی لوڕستانیشی کردووە .
کرێکارانی ڕێگای ئاسن، کە لە ڕێگەی کۆمپانیا پەیمانکارییەکانەوە لە ڕێگای ئاسندا کار دەکەن، چەند مانگە کە بەردەوام بە هۆی ناڕەزایەتی بە نیسبەت دواکەوتنی مووچە و نەبوونی ئەمنییەتی کاری مان دەگرن.
لە ڕۆژانی ڕابردوودا، مامۆستایانی ٦ شاری ئیرانیش لەوانە کرماشان، مەریوان و سنە لە هەمبەر داخوازییە سێنفییەکانی خۆیان لە بەردەم بینای پەروەردەی ئەم شارانەدا کۆبوونەوەی ناڕەزایەتییان بەڕێوە برد و ڕایانگەیاند، کە لە ئەگەری وڵام نەدانەوەی داخوازییەکانیان، درێژە بە مانگرتنەکانیان دەدەن.
