کوردستان میدیا: کچە کوردێکی خەڵکی باشووری کوردستان و دانیشتووی وڵاتی ئامریکا، خەڵاتی ساڵانەی دیاریکراوی کۆنگرێسی ئامریکای بۆ خوێندکارانی زیرەک و بلیمەتی پێ بەخشرا.
ڕۆژی پێنجشەممە، ٣٠ی جۆزەردان، "سارا محەممەد شوانی"، کچە کوردێکی خەڵکی شاری کەرکووک لە باشووری کوردستان و دانیشتووی ویلایەتی "یوتا"ـی ئامریکا، بە هۆی زیرەکی و لێهاتووییەوە، خەڵاتی دیاریکراوی ساڵانەی کۆنگرێسی ویلایەتە یەکگرتووەکانی ئامریکا کە بۆ خوێندکارانی زیرەک و بلیمەتی دیاری کردووە، پێ بەخشرا.
لەم بارەیەوە، "سارا محەممەد" بە میدیاکانی باشووری کوردستانی ڕاگەیاندووە: "جیا لە زیرەکی لە بواری خوێندکاریدا، کاری خۆبەخشانە و مرۆڤدۆستانەش لە وەرگرتنی ئەو خەڵاتەدا ڕۆڵی هەیە و ئەمساڵیش من لە لایەن تیمێکی قوتابییانەوە بۆ وەرگرتنی ئەم خەڵاتە دەستنیشان کرام و خەڵاتەکەم پێ بەخشرا."
ئەم کچە کوردە، کە بە جلی کوردییەوە بۆ وەرگرتنی خەڵاتەکەی لە هۆڵی کۆنگرێسی ئامریکادا حازر بوو، جلە کوردییە ڕەسنەکەی سەرەنجی سەرجەم بەشداربووانی ڕێوڕەسمەکەی ڕاکێشاوە و لەم پەیوەندییەشدا سارا ڕایگەیاندووە: "بە لەبەرکردنی جلی ڕەسەنی کوردی ویستوومە لەو شانازییە مەزنەدا، نوێنەرایەتیی خەڵکی کوردستان بکەم."
"سارا محەممەد شوانی"، لەدایکبووی شاری کەرکوکی باشووری کوردستانە و لە ساڵی ١٣٨٧ی هەتاوی، لەگەڵ بنەماڵەکەی لە ویلایەتی "یوتا"ـی ئامریکادا، وەکوو پەنابەر نیشتەجێ بوونە.
