کوردستان میدیا: لە درێژەی خۆپیشاندانەکانی خەڵکی ئێراندا، کە تا ئێستا لە لایەن هێزەکانی ڕێژیمەوە دەیان کەس کوژراون و سەدان کەسیش بریندار بوونە، کۆشکی سپی، بەکارهێنانی توندوتیژی و کەڵکوەرگرتن لە هێزی زبر و گوشار، دژی ناڕازییانی مەحکووم کرد.
''ئێستێفانی گریشام''، بەڕێوەبەری ڕاگەیاندنی کۆشکی سپی، ڕۆژی یەکشەممە، ٢٦ی خەزەڵوەر، لە ڕاگەیەندراوێکدا وتی: ''ویلایەتە یەکگرتووەکانی ئامریکا لە خۆپیشاندانی ئاشتیخوازانەی خەڵکی ئێران دژی ڕێژیمی ئێران پشتیوانی دەکات''.
ناوبراو وتی: "ئێمە بەکارهێنانی توندوتیژی و کەڵکوەرگرتن لە هێزی زبر و گوشار و سنووردارکردنی تۆڕەکانی پێوەندی دژی ناڕازییان مەحکووم دەکەین."
پاش ئەوەی کە نرخی بێنزین لە لایەن بەرپرسانی ڕێژیمی ئێرانەوە بەرز کرایەوە، لە ڕۆژی ٢٤ی خەزەڵوەرەوە خەڵکی وەزاڵەهاتوو و ستەملێکراوی کوردستان و ئێران بە هاتنە سەرشەقام ناڕەزایەتییان دەربڕی و هاوکات دژی دەسەڵاتداریی ڕێژیمی ئێران دروشمیان دا.
ڕێژیمی ئیسلامی ئێران سەرەڕای ئەوەی کە لە ڕێگای هێزە ئەمنییەکانی خۆیەوە ناڕازییان سەرکوت دەکات، هێڵی ئینتێرنێیشی بەتەواوەتی داخستووە.
