لەحاڵێکدا کە شاری سنە یەکێک لە سەرچاوەکانی دابینکردنی ئاوی سەرجەم ئێران بە هەژمار دێت خەڵکی ئەو شارە لە ئاوێکی پاک و خاوێن بێبەرین.
ماوەیەکی زۆرە کە ئاوی خواردنەوەی شاری سنە بۆن و ڕەنگێکی ناخۆشی هەیە و خەڵکی ئەو شارە ناڕەزایەتییان دەربڕیوە، سەرەڕای ئەوەیکە ڕێژیم بەڵێنیگەلێکی زۆری لەپێناو چارەسەرکردنی ئەو کێشەیەدا دابوو بەڵام هەتاکوو ئێستاش هیچ هەوڵێکی کردەیی ئەنجام نەدراوە.
بژیەنیبوونی(مغذی شدن) ئاوی بەنداوی "وەحدەت" و ڕووانی قەوزە، ڕژانی ئاوەڕۆی گوندەکان، پاشئاوە کشتووکاڵییەکان، کەمبوونەوەی ئاوی بەنداو و هەڵینجان لە قووڵایی پاشەکەوتکردنی ئاوی بەنداو، لە هۆکارەکانی پیسبوونی ئاوی شاری سنەیە.
ئەو کێشانە بووەتە هۆی بۆنی ناخۆش لە ئاوی شاری سنەدا و ئەمە بووەتە قەیرانێک بۆ خەڵکی ئەو شارە.
خەڵک ناچارن بۆ دابینکردنی ئاوی خاوێن، ڕوو بکەنە سەرچاوەکانی ئاو لە کێوی ئاوییەر.
پیسبوونی ئاو کاریگەرییەکی زۆر و بەرچاو لەسەر تەندروستیی مرۆڤ دادەنێت و ئاوی خاوێن بۆ خواردنەوە یەکێکە لە سەرەکیترین و پێویستترین پێداویستییەکانی هەر مرۆڤێک.
