چەند شوێنی "حەسەناوا"ی شاری سنە و کێوی "کوچکەڕەش" لەو شارەدا لەلایەن کەسانێکی نەناسراو ئاگریان تێبەردراوە.
ڕۆژی دووشەممە ١٩ی جۆزەردان، سێ شوێنی شارۆچکەی حەسەناوا لە سنە، لەلایەن کەسانێکی نەناسراوەوە ئاگریان تێبەردراوە کە لەلایەن چەند ڕێکخراو و خەڵکی ناوچەکە کۆنترۆڵ کراوە.
ئەو شوێنانەی کە ئاگریان تێبەردراوە بریتین لە "شێخیەر، باوەسن و تەنیشت مەنبەعی ئاو" کە بە هاوکاریی گرووپەکانی "جەمعییەتی کوردستانی سەوز، دیاری و چلچەمە" کوژاوەتەوە.
لەلایەکی دیکەشەوە کێوی "کوچکەڕەش" لە شاری سنە لەلایەن چەند کەسەوە ئاگری تێبەردراوە و ڕووبەرێکی بەرچاو لەو کێوە لە ئاگردا سووتا.
"عەلی ڕەبیعی"، وتەبێژی ڕێژیمی ئێران وتوویەتی نزیکەی ١٠ لەسەدی ئاگرکەوتنەوەکانی ئەم دوایانە لە ئاستی ئێراندا بەشێوەی ئەنقەست بووە و هەژمارێک لە بکەران دەسبەسەر کراون.
ناوبراو وتوویەتی، دەزگای دادوەری خەریکی لێکۆڵینەوە سەبارەت بەو ڕووداوانەیە و هێشتا دیار نییە چ گرووپ یان کەسانێک خەریکی ئەو کردەوانەن.
ئەو قسانەی "ڕەبیعی" لەحاڵێکدایە کە خودی ڕێکخراو و ئۆرگانەکانی ڕێژیم بەتایبەت سپای تێرۆریستی پاسداران، هۆکاری سەرەکیی ئەو کردەوانەن.
مەبەستی سەرەکیی ڕێژیمی ئێران لەو کارە تێکدانی ژینگەی کوردستان و لەنێوبردنی سروشتی ئەو ناوچانەیە کە سپای تیرۆریستیی پاسداران وەک پڕۆژەیەکی چەندین ساڵە لە هەموو بوارێکەوە خەریکی تێکدانی ژینگەی کوردستانە.
