ڕۆژی چوارشەممە ١٨ی پووشپەڕی ١٣٩٩ی هەتاوی، کەسایەتییەکی خۆشناو و نیشتمانپەروەربە ناوی سەید "وەفا پایمەرد" خەڵکی گوندی "سەردەرێـ"ـی شنۆ، لە تەمەنی ٨٥ ساڵیدا بەهۆی نەخۆشیی شێرپەنجەوە ماڵاوایی لە ژیان کرد.
سەید "وەفا" کەسایەتییەکی حیزبدۆست و خۆشناو بوو کە هەر لە تەمەنی لاویەتیدا تێکەڵ بە کاری سیاسی بووە و لە سەرەتای ڕاگەیاندنی خەباتی ئاشکرای حیزبی دێموکراتی کوردستانی ئێران، چەکی شەرەفی لە شان کرد.
حاجی سید وەفا لە ساڵەکانی ٤٦ و ٤٧ی هەتاوی پێوەندی بە حیزب دەگرێ و وەک کادر ئەرکی حیزبی بەڕێوە دەبرد.
ناوبراو لە شەڕەکانی چۆمی مەجیدخان و نەغەدە بە توندی بریندار کراوە.
سەید وەفا ماوەی چەند ساڵیک پێشمەرگایەتی کردووە و لە نەڵۆس سەرقاڵی کاری حیزبی بووە.
ناوبراو بەهۆی کوردایەتی و نیشتمانپەروەری چەندین جار لەلایەن ڕێژیمی کۆماری ئیسلامیی ئێرانەوە گیراوە و زیندانی و ئەشکەنجە و ئازار کراوە.
ناوبراو وەک ئەندامێکی وەفادار بە حیزبی دێموکرات هەتا دوایین هەناسە بە ڕێبازەکەی وەفادار دەمێنێتەوە.
حیزبی دێموکراتی کوردستانی ئێران سەرەخۆشی لە بنەماڵە، خزم و کەسوکاری ناوبراو دەکات و خۆی بە شەریکی خەمیان دەزانێت.
