ڕۆژی سێشەممە ڕێکەوتی ٢٧ی خەزەڵوەر حاجی " قادر ئاغای بایەزیدی" ناسراو بە "هرمە" کەسایەتییەکی خۆشناوی ناوچەی مەنگوڕایەتیی پیرانشار ماڵاوایی لە ژیان کرد.
حاجی " قادرئاغای بایەزیدی" یەکێک لە ئاغا نیشتمانپەروەرەکانی ناوچەی مەنگوڕایەتیی پیرانشار بوو کە ماڵەکەی هەمیشە شوێنی حەسانەوەی پێشمەرگەکان بوو.
ناوبراو خزمەتی زۆری بە حیزبی دێموکرات و خەباتە ڕەواکەی دەکرد و ئامادە بوو بۆ بەجێگەیاندنی هەر ئەرکێکی حیزبی.
هەروەها لەنێو خەڵکی ناوچەکەدا خاوەن جێگە و پێگەیەکی بەهێزی کۆمەڵایەتی بوو.
ڕێژیمی ئێران زۆر هەوڵی دا ناوبراو بخاتە ژێر ڕکێفی خۆی، بەڵام حاجی "قادر" هیچکات پشتی لە ئامانجە بەرزەکانی نەتەوەکەی نەکرد و تا دواساتەکانی ژیانی وەفادار بە ڕێبازی شەهیدان مایەوە.
حیزبی دێموکراتی کوردستانی ئێران پرسە و سەرەخۆشیی خۆی ئاراستەی خزم و کەسوکاری ناوبراو دەکات و خۆی بە شەریکی خەمیان دەزانێت.
