کوردستان میدیا: یەکیەتیی زانایانی ئایینیی کوردستانی ئێران، بە بۆنەی ٢٥ی گەلاوێژ، ساڵڕۆژی دامەزراندنی حیزبی دێموکراتی کوردستانی ئێرانەوە، پەیامێکیان بڵاو کردوە.
دەقی پەیامەکە بەم چەشنەیە:
بەڕێز، لێپرسراوی گشتی و ناوەندی سیاسی و دەستەی کارگێڕی و کادر و پێشمەرگە خۆڕاگرەکانی حیزبی دێموکرات،
بە بۆنەی ساڵوەگەڕی دامەزرانی حیزبی دێموکرات، گەرمترین پیرۆزبایی یەکێتیی زانایانی ئایینیی کوردستانی ئێران، قەبوڵ بفەرموون.
تێکۆشەرانی ڕێبازی پێشەوا و قاسملوو و شەرەفکەندیی شەهید!
حیزبی دێموکرات وەک یەکەم حیزبی مودێڕن، ڕەسالەتێکی نەتەوەیی، لە ڕۆژهەڵاتی کوردستان هەمیشە جێگای شانازی و خۆشەویستی کۆمەڵانی خەڵکی کوردستانی ئێران بووە و دەبێت، ئێستاکەش ڕاسان وەک پرۆژەیەکی چەند ڕەهەندی بووەتە جێگای هیوا و هومێدی گەلەکەمان و خەڵک هیوایان لەسەر هەڵچنیوە، ئەم پرۆژەیە نەک هەر دەتوانێت پێشمەرگە و ئەندامانی دێموکرات لە دەوری خۆی کۆبکاتەوە، بگرە دەتوانێت ببێت بە پرۆسەیەکی هەمەلایەن لە سەرجەم هێزە شۆڕشگێڕەکانی کوردستان و دەتوانێت ئامانجەکانی پێشەوای نەمر و ڕێبەرانی شەهید و هەزاران شەهیدی تێکۆشەر لە ڕێبازی دێموکرات وەدی بێنێت، یەکێتییەکەمان هەمیشە پشتیوانی لە حیزبی دێموکراتی وەک ئەرکێکی گرنگی نەتەوەیی لە ئەستۆ گرتووە و هیچکات پشت لەم پشتیوانییە ناکات. جارێکی تر ۲٥ی گەلاوێژ لە هەموو ڕێبوارانی ڕێبازی دێموکرات و ڕاسانییانی بەوەفای ڕێبەرانی شەهید بەرز و پیرۆز بێت.
یەکیەتیی زانایانی ئایینیی کوردستانی ئێران
