بەشێک لە خاوەن زەوی و مڵکی سەروو و خوارووی بەنداوی "سێمرە"ی ئیلام، لەسەر داواکاریی خاوەنکاری شیرکەتی گەشەی سەرچاوەی ئاو و وزەی ڕێژیمی ئێران بۆ دروستکردنی ئەو بەنداوە زەوییەکانیان بەجێ هێشتووە، بەڵام هەتا ئێستا هیچ پارەیەکیان پێ نەدراوە.
ڕوونکردنەوەی چارەنووسی زەوی و زاری هاووڵاتییان یەکێک لە داواکارییە سەرەکییەکانی خەڵکە، بەڵام ئەو کێشەیە لەلایەن کاربەدستانی وەزارەتی وزە و بەڕێوەبەرانی بەنداو و وزەخانەوە چارەسەر ناکرێت.
بەنداوی "سێمرە" یەکێک لە بەنداوە گەورەکانی ئێرانە و لە بواری دەفرایەتی و بەرزاییەوە گرینگییەکی زۆری لە بواری کشتوکاڵ و بەرهەمە ئاوییەکانەوە هەیە.
هەروەها هەر ساڵە بەهۆی بەردانی ئاوی بەنداو، دەیان هێکتار لە زەوی و باخەکانی هاووڵاتییان خەساری بەر دەکەوێت.
هەتا ئێستا زیانبەرکەوتووان چەندین جار لەلایەن کاربەدەستانی پەیوەندیدارەوە سکاڵایان تۆمار کردووە، بەڵام هیچ وڵامێکیان پێ نەدراوەتەوە.
