ناڕەزایەتیی خەڵکی وەزاڵەهاتوو دژ بە ڕێژیم لە زۆربەی شارەکانی ئێران بەردەوامە و خەڵک دژی بەرپرسانی باڵای ڕێژیم دروشم دەدەن.
"بروجێرد" لە پارێزگای "مەشهەد"، "هەفشنجان" لە پارێزگای چوارمەحاڵ و بەختیاری، شاری "ئەهواز" و شارۆچکەی "کاروان" لە تاران و... لەو شارانە بوون کە ئێوارەی ڕۆژی شەممە خۆپیشاندان و ناڕەزایەتییان لێ بەڕێوە چوو.
ئێوارەی ڕۆژی شەممە ٢٤ی بانەمەڕ لە شاری "هەفشنجان" لە پارێزگای چوارمەحاڵ و بەختیاری خەڵک ڕژانە سەر شەقام و بە دانی دروشمی "مەرگ بۆ خامنەیی" بنێری "ئیبراهیم ڕەئیسیـ"ـیان سووتاند، دواتر هێزەکانی پایەگای بەسیج بە تەقەکردن و هەڕەشەکردن بەرەوڕووی خەڵک بوونەوە.
هەروەها ئێوارەی ڕۆژی شەممە خەڵک لە شاری "ئەهواز" ڕژانە سەر شەقام و وێڕای دروشمدان بنێری "عەلی خامنەییـ"ـیان سووتاند.
لە "نەیشابوور" لە ڕۆژهەڵاتی ئێران خەڵک دژ بە گرانییەکان و دۆخی خراپی ژیان ڕژانە سەر شەقام و دژی ڕێژیم و خامنەیی دروشمیان دا.
لە "بروجێرد" و "قووچان" لە پارێزگای خوراسان خەڵک بۆ دەربڕینی ناڕەزایەتی ڕژانە سەر شەقامەکان و لەگەڵ هەڕەشە و تەقەی هێزە ئینتزامییەکان بەرەوڕوو بوونەوە.
لە کوردستان بە گشتی و بەتایبەت لە شارەکانی سنە، مەهاباد، شنۆ و جوانڕۆ ڕێژیم لە ترسی هاتنی خەڵک بۆ سەر شەقامەکان حکوومەت نیزامییان بەڕێوە بردووە و هێزەکانی ڕێژیم بەردەوام بە نێو شارەکاندا دەسووڕێنەوە.