ئەندامانی حیزبی دێموکراتی کوردستانی ئێران لە بۆکان، بە نووسینی پەیامێک پیرۆزبایی گەڕانەوەی "عوسمان مستەفاپوور" بۆ نێو حیزب و هاوسەنگەرانی دەکەن.
دەقی پەیامەکە بەم چەشنەیە:
هەموومان بۆ بەرزیی خاکی نیشتمان، سەر و ماڵمان بۆ ئازادی دەکەین بە قوربان، جەلادانی کۆماری سێدارە بە بیری تەسک و چەقبەستوویان وایانزانی دوای ٢٨ ساڵ بەندکردن و ئەشکەنجەدان چۆکیان بە قوتابییانی "قازی، قاسملوو و شەرفکەندی" داداوە و لە بیر و باوەڕی کوردایەتی پاشگەز بوونەتەوە.
پێیان وایە گرتن و لێدان، زیندان و ئەشکەنجە هەنگاومان بۆ ئازادی و سەربەخۆیی بێهێز دەکات، بەڵکوو بەپێچەوانەوە، چەوسانەوەم بەهێزترم دەکات بۆ گەیشتن بە ئامانجی بەرزی ڕزگاریی خاک و خەڵکەکەم.
دوای ٢٨ ساڵ ناحەقی و دڵڕەقی کە بەرانبەرم کرا، زۆر لە جاران بەگوڕتر گەڕامەوە نێو بنەماڵەکەم کە پێتان بڵێم، تاک بە تاکی خەڵکی کوردستان لە بنەماڵەی منە و بنەماڵەی من حیزبی دێموکراتی کوردستانی ئێرانە.
هاتووم هەتا خەباتی شاخ و شار گەرم و گوڕتر بکەم، شان بە شانی هاوڕێ و هاوسەنگەرانم ڕاسان بەرەو لووتکە ببەین بۆ وەدیهێنانی ئامانجی پیرۆزی شەهیدان و زیندانییانی سیاسی و خەڵکی بەئەمەگ و خۆشەویستی کوردستان.
سڵاو لە کاک "عوسمان مستەفاپوور"، سڵاو لە کاک "والی دروودی"، سڵاو لە پێشمەرگەی کوردستان، سڵاو لە حیزبی دێموکراتی کوردستانی ئێران.
سەرکەوێ ڕاسان.
