ئەندامێکی تێکۆشەری حیزبی دێموکراتی کوردستانی ئێران بەهۆی کۆرۆناوە لە نەخۆشخانەی "تاڵەقانی" لە ورمێ کۆچی دوایی کرد.
ڕێکەوتی ٢٣ی سەرماوەز، کاک "ڕەسووڵ شەعبان" کوڕی حاجی "مارف"، لەدایکبووی ساڵی ١٣٥٩ی هەتاوی و خەڵکی گوندی "خانلەر" سەر بە شاری شنۆ کۆچی دوایی کرد.
ناوبراو لە ساڵی ١٣٨٧ی هەتاوییەوە پەیوەندیی بە تەشکیلاتی نهێنیی حیزبەوە گرتووە و وەکوو ئەندامێکی نهێنیی حیزبی دێموکرات خزمەتی بە بزووتنەوەی گەلی کورد کردووە.
کاک "ڕەسووڵ" کەسێکی ڕۆح سووک و خۆشەویست لەلای خەڵکی شنۆ و دەوروبەری بووە و هەتا دواهەناسە وەفادار بە ئارمانی شەهیدانی سەرکردە "قازی، قاسملوو و شەرفکەندی" بوو.
تەرمی ناوبراو لە گوندی خانلەر بە خاکی پیرۆزی کوردستان ئەسپێردرا.
حیزبی دێموکراتی کوردستانی ئێران سەرەخۆشی لە بنەماڵە، خزم و کەسوکاری ناوبراو دەکات و خۆی بە هاوبەشی خەمیان دەزانێت.
