Termê Elî Simko Nevyê rêberê navdare tevgêra rizgarîxwaze Kurd, şehîd Simkoyê şikak li bajarê vêstrosê li welatê Swîdê bi axê hate spartin.

Roja Înê 22 yê Kanûna pêşîn a 2023an, termê Elî Simko, kurê Tahir xan Simko û nevyê Simkoyê Şikak li merasimekî berfireh de, bi beşdariya malbat û kesûkar û dost û nasiyaran û bi taybetî sedan endam û alîgirên Hizba Demokrat û bi rêkxistina kumîta Hizba demokrat li welatê Swîdê, bi axê hate spartin.

Herwisa piştre li salonekê de her li bajarê Vêstrosê de, merasima sersaxî û hevxemiyê hate bi rê ve birin ku Kurdên her çwar perçên Kurdistanê ji Swîdê û welatên dinê ye ewrûpa tê de beşdar bûn.

Li vê merasimê de rezdar Hesen Şîweselî endamê Rêberiya Hizba demokrat û dostê nêzîk yê nemir Elî Simko, li ser kesayetî û xebata Elî Simko û malbata welatparêze wî kir.

Elî Simko hefteya derbasbûyî bi sedema nesaxiyê li temenê 77 saliyê de li welatê Swîdê koça dawî kir.

Elî Simko piştî serkevtina şoreşa gelên Îranê û sernixûniya rejîma dîktatore paşayetî, û hatina ser kare rejîma kevnarperwere Îslamî, û red kirina daxwazên netewiye gelê Kurd, û digel destpêkirina xebata aşkera a Hizba Demokrat, Elîxan û malbata xwe a welatparêz hêza Berevaniya Netewî a şehîd Simko pêk anî ku hêzekî Hizba Demokrat bû û nemir Elî simko bo heyamê çendîn salan serperestiya wê hêzê dikir.

Sala 1984an piştî dagîrkirina nawçên Kurdistanê ji aliyê rejîma Xumeynî ve, Elî Simko digel malbat û zarokên xwe amade nebûn serê xwe bo dujmin biçemînin û teslîm bin, lewra rêka penaberî û derkevtina ji welat girte bera xwe û li welatê Swîdê akincî bû.

Heya ku bi serbilindî û li ser wefadariya bi rêbaza netewî û armancên gel, di roja Sêşemiya hefteya derbasbûyî li temenê 77 saliyê de koça dawî kir, riha wî şad û bila serê malbata wî û gelê me sax be.