Heval û hevkarên hêja li ‘’Agirî’’yê

N. Selîm Zencîrî

Niha ku dibînim karwanê xebat û tekoşîna ‘’Agirî’’yê bênavber berdewam dike û gihaye hejmara 500 a xwe, dixwazim ji dil û can vê deskefta mezin û buhagiran ji we û hemû xwendevan û şopînerên Agirî pîroz bikim. Bêguman pêncsed ne tenê hejmarek, belkî nîşana hewildanên dûr û dirêj û bênavber e di pêxem şopandina heqîqetê, hişyarkirina civakê û geşedana pênûs û hizrên ku li hember asmîlasiyona zimanî, çandî û netewî de bûne çeper û qelxanek polayîn.  

Her rûpel ji van hejmaran, hilgirê dehan çîrok û destanrêsiyan e ji şeqîtî, strês, hedarî û tekoşîna we û xebatkarên ku di her rawestegeh ji tekoşîna Agirî de, xwedî bandor bûn û nehiştin şemendefira pêşdeçûna Agiriyê ji liv û herikînê bisekine. Agirî berhema eşq û evîna bi kar û berpirsatiyekê ye ku we hildaye ser milê xwe. Agirî ne tenê kar û erkê nûçe û nivîs û xemlandina rûpelan, belkî hilgirê erk û resaletek dîrokî û netewî ye ku bi derbaskirina tixûban û avakirina pirên pêwendiyê bû bi balyozê heqîqet û rastbêjiya gel û wekî mom û şemalkek teyîsî di tarîtiya zulm, bêdadî û bêbextiyê de, ronahî da çarmedorên xwe. 

Agirî ku îro serbilind, şanaz û li ser piyan e, berhema rol, cehd, tekoşîn, emegnasî û nirxdayîna dehan rojnamevan, rewşenbîr û nivîskarên kurd e ku li pişt her hizir, peyv, hevok, nivîs û xemlek Agiriyê, hêz, moral, îrade û ked û zehmeta wan heye ku îro bûne sermiyanek mezin a netewî; lewma ew ne tenê xwediyê vê serkevtinê, belkî hêjayî medalyaya şeref, şanazî û emegnasiyê ne. 

Bêguman gehîştina bi vê hejmarê ne hêsan e, lê dawiya maratonê jî nine, hêj zaf peyv û hedîsên manadar û bedev mane ku li benda gotinê ne. Lewma bila her hejmarek nû; mosîqayek be ji bo lêdana dilê welat, neynûnek be ji bo xwedîtin û nîşandana kul û kovanên gel û xemla welat, kevirek be li ser dîwarê xizmet bi çand, ziman û wêjeya kurdî, merhemek be bo hesreta dilê dayîkan û hêsirê çavê wan, û rihek taze bide ber xwendevan û şopîneran.

Hevalên birûmet!

Bo min şerefmendî û şanaziyek mezin e ku endamê desteya avaker û sernivîskarê Agirî di qonaxek girîng û hesas ji tekoşîna vê rojnameyê de bûm û îrorojê ku hûn mîratgirê vê sermiyana binirx û berpirsatiya giran in, xatircem im ku emanetdarên hêja û baş in di parastina vê qutabxaneya hizrî û çandî ku li ser şopa heqîqetê û rêbaza xizmetê ava bûye.

Tevî pîrozbahiya dubare, we tevan bi rêzdarî silav dikim û destên we ku hizr, pênûs, evîn û xebat li hev alandine û pêwenda wan hertimî kirine, bi germî digivişim û hêviya berdewamî, geşe û serketinê bo we û Agiriyê dixwazim.

Selîm Zencîrî, endamê Desteya Avaker û Sernivîskarê berê yê Agirî