Agirî sembola xwendin û berxwedanê
N. Şehab Xalidî
Kêfxweş im ku bi vê nivîsa kurt hejmara 500î ya Agirî pîroz dikim. Kêfxweş im ku Agirî karî bi hewl û tekoşîn û ked û mandîbûna hevalên dilsoj bi ser hemû astengiyan de serkeftinê bi dest bixe û bibe kelemê çavê neyar û nehezan.
Bêguman Agirî di rewşekê de hate avakirin, ku serbarê nebûna îmkanatên madî û teknîkî, û nebûna şarezî û pisporiyê di karê rojnamevaniyê de, hevalên dilsoj û xemxor zendê xwe hildan, û bi dil û can û bi evîneke efsûnawî wekî evîna Mem û Zînê xebitîn bona ku hejmara yekem ya Agirî wekî mizgîniyekê bidin hemû wan dost û hevalên ku li benda derketina tîrêjên wê roja bedew û ronahî bûn.
Wê rojnameyê gelek zû karî di nav dilê evîndarên xwe de hêlûneke ebedî ji xwe re çêke, û bibe çavkaniya zanyariyên rast û şiroveyên bihêz û dewlemend. Ji hemiyê girîngtir karî ku bibe pirek di navbera Rojhilatê Kurdistanê û parçeyên din ên Kurdistanê bi Kurdên Qefqaziyayê ve jî, ku berî derketina Agirî zanyariyên wan li ser PDKÎ û Rojhilatê Kurdistanê yan tunebûn an jî kêm bûn.
Herwiha bi bikarhînana zimanekî zelal û di heman demê de rast û dirust di warê rênivîs û rêzimanê de karî bibe xwendingehek ji bo hemû hezkiriyên alfabeya latînî.
Dema ku ez carina li hejmarên berê yên Agirî dinêrim, rûpel bi rûpelên wê min dibin nav xeyalên kûr de, xeyalên ku di nav bîreweriyên tal û şirîn de asê dimînin. Darêtina nûçe û raporên tal ên girêdayî qedera xak û neteweya me em xembar dikirin, û berevajî wê yekê jî em kêfxweş dikirin.
Belê Agirî êdî bi tenê rojnameyek nebû, belku bûbû zarokeke malbatê, ku mirov tenê û tenê li benda serkeftina wê bû, û niha jî herwisa.
Niha ku Agirî moma xwe ya 500î pêdixe, ez daxwaza temendirêjiyê jê re dikim, û hêvî dikim roj bi rojê bazineya kar û xebata xwe berfirehtir bike û li gor teknîka modern a îrorojê here pêş, û bibe çavkanî bo hemû wan kesên ku dixwazin hem zanyariyan jê wergirin û hem jî wekî xwendingehekê jê fêr bin.
Di dawiyê de hêviya silametî û temendirêjiyê bo hemû wan kesan dixwazim ku ji bo berdewamiya Agirî ked dane û niha jî kedê didin.
Şehab Xalidî, Berpirs û sernivîskarê berê yê Rojnameya Agirî
