Li gorî raporên medyayê, Wezareta Berevaniya Amerîka (Pentagon) planên pêşketî ji bo operasyoneke bejayî ya çend hefteyî li Îranê amade kirine.
Rojnameya Washington Post, ji zarê berpirsên Amerîkî yên ku nexwestin navê wan eşkere bibe ragihand ku ev plan operasyonên bejayî yên hêzên taybet û her wiha hêzên konvansiyonel (asayî) li girava Xarkê li xwe digire.
Ev girava ji bo hinardekirina nefta Îranê xwedî girîngiyeke jiyanî ye û her wiha li herêmên peravê yên nêzîkî Tengava Hurmuzê ye.
Li gorî raporta vê rojnameyê, tevî vê yekê jî, dagirkirineke bejayî ya tam ji bo ser Îranê ne beşek ji van planên Pentagonê ye.
Heta niha Donald Trump, Serokkomarê Amerîkayê, bikaranîna hêzên bejayî li Îranê pesend nekiriye. Marco Rubio, Wezîrê Karên Derve yê Amerîkayê, roja înê tekez kir ku ji bo gihîştina bi armancên şer ên Amerîkayê li Îranê, pêdivî bi hêzên bejayî nîne.
Trump roja şemiyê li ser tora civakî ya Truth Social daxwaz ji welatiyên Amerîkayê kiribû ku guh bidin bernameya Mark Levin, analîstê Amerîkî yê kanala Fox News. Trump tekez kiribû ku ev bername "derbarê girîngiya lêdana dijwar li Îranê" ye.
