Bo raya giştî û navendên navneteweyî!
Ber bi nûnertiya Rêxistina Neteweyên Yekbûyî li Iraq û Herêma Kurdistanê!
Ber bi Hikûmeta Federal a Iraqê!
Rejîma terorîst a Komara Îslamî ya Îranê, bi mebesta veşartina şikestên xwe yên siyasî, leşkerî û stratejiyên îdeolojîk di dema şerê 39 rojî yê ligel Amerîka û Îsraîlê de, bi berdewamî êrîşî ser bingeh û baregehên hizbên Rojhilatê Kurdistanê û kampa niştecihbûna malbatên kadro û pêşmergeyên wan li Herêma Kurdistanê kiriye. Tevî ku niha agirbest heye jî, ew êrîş her berdewam in. Di nûtirîn êrîşê de ku roja borî 28ê Xakelêweya 1405 bi mûşek û dronan kirin ser kampên sivîl û baregehên Hizba Demokrat a Kurdistana Îranê; mixabin 3 pêşmerge û têkoşerên rêya azadiyê bi navên Şahîn Azarberzîn, Neda Mîrî û Semîra Ellahyarî şehîd bûn û 2 pêşmergeyên din jî birîndar in.
Komara Îslamî ya Îranê berê jî ji bilî bingeh û baregehên hizbên siyasî yên Rojhilatê Kurdistanê û cihê niştecihbûna malbatên wan, bi berdewamî êrîşî ser Herêma Kurdistanê kiriye ku mixabin di wan êrîşan de 11 kes şehîd û qurbanî bûn.
Hevpeymaniya Hêzên Siyasî yên Kurdistana Îranê, tevî şermezarkirina tund a vê tawane û hemû êrîşên terorîstî yên Komara Îslamî yên li ser têkoşerên Rojhilat û şehîdkirina 10 têkoşerên hizbên endam ên hevpeymaniyê, radigihîne:
Rû bi hikûmeta Iraqê ve radigihînin: Pêwîste helwest û bertekên wan ên cidî hebin û gavên pratîkî, yasayî û eşkere bihavêjin ji bo parastina canê penaberên siyasî û rêgirtin li dubarebûna van tawanan. Parastina serweriya xak û giyanê niştecihên Herêmê, erkekî destûriye; bi taybetî ku ew Komara Îslamî ya Îranê ku rêkeftina ewlehiyê ya navbera her du welatan binpê kiriye.
Rexneyên tund li nûnertiya Rêxistina Neteweyên Yekbûyî (UN) li Iraq û Herêma Kurdistanê digirin: Em di wê baweriyê de ne ku bêdengî û pasîvmayîna wan li hember van tawanên şerî û piştguhxistina erkên wan ên mirovî, destê rejîma Tehranê ji bo destdirêjî û terora zêdetir vekiriye. Em daxwaz dikin ku ev êrîş wek tawana şer û terora navneteweyî werin naskirin, tomarkirin û helwest li ser werin girtin.
Bi tundî rexne li siyaseta lihevkirin û bazarkirina welatan ligel Komara Îslamî digirin: Em tekeziyê li ser wê rastiyê dikin ku vê rejîma dîktator ewlehî û aramiya hemû cîhanê kiriye rehîn û her dem danûstandin û saziş bi civaka navneteweyî re ji bo kirîna demê bo pêşxistina armancên xwe bi kar aniye. Lewma dema wê hatiye ku Encumena Ewlekariya Neteweyên Yekbûyî bertekek bilez nîşan bide û civaka navneteweyî bi sazişkirina ligel Tehranê re êdî destê rejîmê ji bo berdewamiya teror û kuştarê vekirî nehêle.
Daxwaz ji hemû Kurdên li derveyî welat dikin: Bi plan û bernameyên bi hêz, bi rêxistinkirina aksiyon û meşên aştiyane bi şêweyekî berdewam werin ser şeqaman. Li ber balyozxane, konsulxaneyên rejîmê û navendên biryardanê bicivin û dengê nerazîbûna neteweya me bilind bikin.
Di dawiyê de, Hevpeymaniya Hêzên Siyasî yên Kurdistana Îranê careke din dost û dijminan piştrast dike ku ev êrîş û qurbaniyên hêzên me, ne tenê îradeya me nahejînin, belkî baweriya me ya bi rewayiya xebata ji bo rizgariya Kurdistanê û rûxandina vê rejîmê û bi biryardariya me ya li ser berdewamiya xebatê hîn qahîmtir dike.
Nemirî bo şehîdan û serkeftin bo rêya azadiyê.
Hevpeymaniya Hêzên Siyasî yên Kurdistana Îranê
17ê Nîsana 2026 an a Zayînî
