​Pêwendiyên Giştî yên Spaha Pasdaran bi weşandina daxuyaniyekê, nûçeya kuştina Mecîd Xadimî, berpirsê Rêxistina Îtîlaatê ya Spahê ragihand; bûyerek ku di berdewamiya zincîre êrîşên armancdar ên li ser berpirsên leşkerî û ewlehiyê yên Komara Îslamî tê hesibandin.

​Vê daxuyaniyê tu hûrguliyên zêdetir derbarê cihê kuştina Xadimî de belav nekiriye, tevî vê yekê, berê sibêya roja duşemê çendîn êrîşên asmanî herêmên cuda yên Tehranê kirin armanc.

​Rêxistina Îtîlaatê ya Spaha Pasdaran wek yek ji baskên sereke yên ewlehî û serkutker di Komara Îslamî de tê naskirin, ku li kêleka Wezareta Îtîlaatê ya Komara Îslamî ya Îranê, roleke sereke di serkutkirina nerazîbûnan, girtina dijberan û sepandina guşarê li ser civaka medenî de hebûye.

​Kuştina Xadimî tenê çend meh piştî kuştina Mihemed Kazimî, berpirsê berê yê vê saziyê di dema pevçûnên leşkerî yên vê dawiyê de, nîşanderê berdewamiya proseya jinavbirina armancdar a kesayetên sereke ye di pêkhateya ewlehî ya Komara Îslamî de.

​Di vê pêwendiyê de, Yisrael Katz, Wezîrê Bergiriyê yê Îsraîlê bi balkişandina ser wê yekê ku Xadimî yek ji sê berpirsên pilebilind ên Spahê bûye, got ku kuştina wî derbeke giran e li şiyanên îtîlaatî û operasyonî yên Spaha Pasdaran.