​Şehbaz Şerîf, Serokwezîrê Pakistanê, ragihand ku raportên derbarê şikandina agirbesta di navbera Dewletên Amerîka û Îranê de gihîştine destê wan û bang li aliyên şer kir ku xwe ragirin.

​Wî ragîhand ku "li çend xalên herêma şer binpêkirinên agirbestê hatine raportkirin ku ev yek rihê proseya aştiyê lawaz dike."

​Şerîf lê zêde kir: «Ez daxwazê ji hemû aliyan dikim ku xwe ragirin û rêzê li agirbesta duhefteyî ya ku li ser hatiye lihevkirin bigirin, da ku dîplomasî bikaribe di rêya çareseriya aştiyane ya vê nakokiyê de rola sereke bilîze.»

​Ev lihevkirin kêmtirî du saetan beriya bidawîbûna dema gefxwarinê ya Donald Trump ji bo Komara Îslamî, di saetên destpêka sibêdeha roja çarşemê 19ê Xakelêwê de pêk hat.

​Trump ku berê muhleteke 10 rojan dabû, gef xwaribû ku heger heta saet 3:30ê berbangê roja çarşemê bi dema Îranê lihevkirin pêk neyê û Tengava Hormuzê neyê vekirin, ew ê êrîşeke giran û berfireh bike ser wizegehên elektrîkê û pirên Îranê.

​Di encamê de bi navbeynkariya Pakistanê diyar bû ku her du alî li ser agirbesteke duhefteyî li hev kirine û biryar e bi berdewamiya danûstandinan ev lihevkirin bibe ya dawî.