Li pey kuştina Ebûzer Hemlî, endamê 23 salî yê Eniya Têkoşerên Gel, di pevçûnên çekdarî yên bajarê Raskê de, wêneyekî hêzên leşkerî û ewlehiyê yên Komara Îslamî hatiye belavkirin ku ew diyar dike li kêleka cenazeyê vî ciwanê Bûlûç wênê digirin.

Wêne di roja yekşemê 19ê Rezberê de hatiye belavkirin û bi bûyerên piştî pevçûna roja 10ê Rezberê li bilindahiyên derdora gundên Bîdild û Şûşgîm a bajarê Raskê ve girêdayî ye.

Di wêneya belavkirî de, sê kes li ser cenazeyê Ebûzer Hemlî rawestiyane. Du kes unîforma û alavên leşkerî li xwe ne û kesê sêyem bi kincên xwecihî, çekek Qinasse girtiye destê xwe.

Ebûzer Hemlî, kurê Ebdulhelîm û ji xelkê gundê Abçegî yê herêma Neskend a bajarê Serbazê, di dema pevçûna di navbera hêzên rêjîmê û Eniya Têkoşerên Gel de jiyana xwe ji dest da.

Di yasaya navneteweyî ya mirovî de, parastina rûmet û kerameta cenazeyên kuştiyan ji erkên bingehîn ên aliyên pevçûnê tê hesibandin. Reftarên sivikatî bi cenazeyan re, li gorî şert û mercên xwezaya pevçûnê, dikarin bibin mijara qedexeyên yasayî.

Halvaş daxwaz kiriye ku nasnameya kesên di wênê de amade ne diyar bibe, awayê reftara bi cenazeyê Ebûzer Hemlî re bê lêkolînkirin û şert û mercên radestkirina cenaze ji malbata wî re diyar bibin.