Dr. Necmedîn Kerîm, parêzgarê berê yê Kerkûkê, piştî nexweş ketinê li Amerîkayê canê xwe ji dest da û li ser daxwaza wî termê wî dê bo Kerkûkê bi axê bê spartin.

Nivîsingeha Parêzgarê berê yê Kerkûkê Necmedîn Kerîm roja 28ê vê mehê ragihandibû ku Dr. Necmedîn Kerîm tûşê celteya mejî bûye û li nexweşxaneyê di bin çavdêriyê de ye.

Pêka daxuyaniya nivîsingeha wî, Necmedîn Kerîm berî koça dawî, raspardeyek bi cih hişt ku ji bo selametî û tendirustiya giştî di rewşa niha ya belavbûna Koronayê de, ti cor qerebalix û taziyekê bo neyê dayîn.

Dr. Necmedîn Kerîm, sala 1949an li Kerkûkê ji dayîk bû. Heta xwendina amadeyî li wî bajarî bû û paşê çû Mûsilê û beşa pizîşkî li Koleja Pizîşkiyê ya Mûsilê xwend. Dr. Necmedîn Kerîm sala 1972an jî bû Pêşmerge.

Dr. Necmedîn Kerîm sala 1975an Îraq bi cih hişt û li Amerîkayê bi cih bû û sala 2009an jî vegeriya Kerkûkê û ji sala 2011an heta 2017an parêzgarê Kerkûkê bû.